ဒဂုံမြို့သစ် အရှေ့ပိုင်း မြို့နယ်ရှိ မြေကွက်တချို့ကို မူလမြေကွက် ဖော်ထုတ်သည့် ကုန်ကျစရိတ် အတိုင်းသာ ပြန်လည် ပေးလျော် သွားမည်

 ဒဂုံမြို့သစ် အရှေ့ပိုင်း မြို့နယ် အင်းဝ လမ်းရဲ့ အရှေ့ဘက် ခြမ်းမှာရှိတဲ့ မြေကွက် တချို့ကို ၀ယ်ယူ ထားတဲ့ မြေပိုင်ရှင် ၀န်ထမ်း တချို့အား မြို့ရွာနှင့်
 

အိုးအိမ် ဖွံ့ဖြိုးရေး ဦးစီးဌာနမှ မူလ၀ယ်ခဲ့တဲ့ မြေကွက် ဈေးနှုန်းအတိုင်း ပြန်လည် ပေးလျော် သွားမှာ ဖြစ်တယ်လို့ အဆိုပါ ဌာနမှ တာဝန်ရှိသူ တစ်ဦးရဲ့ ပြောကြားချက် အရ သိရပါတယ်။ ဒီလို ပြန်လည် ပေးလျော် ရာမှာလည်း မူလက အဆိုပါ ၀န်ထမ်းများ ၀ယ်ယူခဲ့တဲ့ ငွေကျပ် ၁၂၀၀၀ အတိုင်း ပြန်လည် ပေးလျော်တာ ဖြစ်ပါတယ်။ အဆိုပါ မြေကွက်တွေ ကိုတော့ ၀န်ကြီးဌာန အောက်တွေ မှာရှိတဲ့ အစိုးရ ရုံးများမှာ တာဝန် ထမ်းဆောင် နေကြတဲ့ ၀န်ထမ်းများက ပိုင်ဆိုင်ကြတာ ဖြစ်တယ်လို့ သိရပါတယ်။

ဒီလို ပြန်လည် သိမ်းယူရာ မှာလည်း ဒဂုံမြို့သစ် အရှေ့ပိုင်း မြို့နယ် အင်းဝလမ်း အရှေ့ဘက်ခြမ်းရှိ မြေတိုင်းရပ်ကွက် ၁၁ ခု၊ မြေကွက် စုစုပေါင်း ၈၀၇၉ ရှိပြီး မြေကွက် တစ်ကွက် ကိုတော့ ပေ ၄၀ x ပေ ၆၀ ကျယ်ဝန်းတာ ဖြစ်တယ်လို့ သိရပါတယ်။ လက်ရှိ မှာတော့ အဆိုပါ မြေကွက်ကို ပိုင်ဆိုင်တဲ့ ၀န်ထမ်းတွေ အနေနဲ့ မိမိတို့ ပိုင်ဆိုင်တဲ့ မြေကွက်ဖိုးငွေ များကို လာရောက် ထုတ်ယူမှု ကိုတော့ မတ်လ ၈ ရက်နေ့မှ ၃၁ ရက်နေ့အထိ နေ့စဉ် ၁၀ နာရီမှ ၁၆ နာရီအတွင်း ရန်ကုန်နဲ့ နေပြည်တော် တို့မှာရှိတဲ့ မြို့ရွာနဲ့ အိုးအိမ် ဖွံ့ဖြိုးရေး ဦးစီးဌာနကို လာရောက် ထုတ်ယူ နိုင်တာ ဖြစ်ပါတယ်။

ဒီလို လာရောက် ထုတ်ယူတဲ့ ၀န်ထမ်းများ အနေနဲ့ မိမိတို့မှာ ရှိတဲ့ မြေချပါမစ် မူရင်း၊ မြေငှား စာချုပ် မူရင်း နိုင်ငံသား စိစစ်ရေးကတ် ဒါမှမဟုတ် ၀န်ထမ်းကဒ်များ ယူဆောင် လာရမှာ ဖြစ်တယ်လို့ သိရပါတယ်။ မြို့ရွာနှင့် အိုးအိမ် ဖွံ့ဖြိုးရေး ဦးစီး ဌာန အနေနဲ့ ယခုလို မြေကွက်များ ချထားပေး မှုကို ပယ်ဖျက် တာဟာ အဆိုပါ မြေကွက် တွေဟာ ခေတ်မီ စက်မှုလယ်ယာ စံပြအထူး စိုက်ပျိုးရေး ဇုန်အဖြစ် နိုင်ငံတော်မှ ဖော်ထုတ် ဆောင်ရွက်တဲ့ စီမံကိန်း ဧရိယာများမှာ ပါဝင်တဲ့ အတွက် ယခုလို ပယ်ဖျက်တာ ဖြစ်တယ်လို့ သိရပါတယ်။

MRTV-4